قد الحياة

كل واحد فينا مر ف حياته بمراحل مختلفه “أزمات وأوقات نجاح، فرح وبكا.. وقوف وعثرات” وكل مرحله من دى بتبقى عامله زى فصول المسرحيه كل فصل ليه محنته ليه حبكته ليه طعمه ولونه وتأثيره وبصمته على طباعنا وأرواحنا، وخط سير حياتنا وواقعنا وومستقبلنا .. وكل فصل م المسرحيه دى بيبقى زى السنه بتحصل فيه تغييرات كتير، واقعنا ومستقبلنا بيتشكل وبيتبدل : ربيع وصيف وخريف وشتا فصوول وأجواء وأحداث ومواقف بتغير فى تضاريس واقعنا وبتشكل شخصياتنا وأرواحنا.

 فيه اللى بيطلع جوا روحه حفر وجبال وفيه اللى بيملا الدنيا زروع ووديان وأشجار، فيه اللى بتنطفى ألوانه ويتحول للأبيض والأسود وممكن ميشوفش الأبيض كمان، وفيه اللى بتزيد ألوانه زهاء وجمال وحلاوه ونقاوه ..

إياك تفرق فى أحكامك على الفصول، وتقول الربيع حلو ولا الخريف وحش .. كل فصل فيه الحلو والوحش .. تلاقى الربيع ورد بس ليه شوك وجرح وخماسين تغدر بيك، وتلاقى الصيف فيه غضب وحرارة، زى ما فيه بهجه وألوان ساطعه، الخريف برضو بتتساقط فيه أوراق الشجر وتزيد الرياح، إنما اللى بيحصل دا أذان إن سنة التغيير بتحصل : ممكن للأحسن ممكن للأوحش ربنا بس اللى يعلم إانت من بعد علمه تقول.

  أما الشتاء وحشة ووحدة وبرد بس ممكن كمان قهوه وحضن ودفا . فصول حياتك بمراحلها وأزماتها وأحداثها وألوانها .. كلها بسلطاتها بباباغنوجها كدا بتبنيك، تنحت فيك، تشكل روحك، تنورك وتخليك تعرف معنى لحياتك، إيه هدفك فيها، وإيه تاخده منها ومن تجاربها، طريق يوصلك ويوديك للمصب اللى هتهدى فيه روحك عند ربنا توديك عند جنة الآخرة ونعيمها أو نار تحرقك ..

وإنت عليك تختار ربنا إداك حرية الاختيار .. تواجه الفصول دى زى الصخر ولا زى الورده ولا زى القمر ولا زى الشمس ولا زيك بتتشكل مع مواقفك بتكبر ورؤيتك بتوسع ولا زيك مضلم ومطفي ومبتشوفش النور .. بص جوا روحك والمسها وخدها للنور وشوف حياتك بلونها الصح وطعمها الصح وريحتها ..

 خلى رحله حياتك رحله استكشاف لذاتك لقدراتك لقوه احتمالك ليقينك بالله ورحمته لثقتك العمياء إنك قد الرسالة .. قد التحدى .. قد الحياة

هبة يسري

هبة يسري

إنسانه بسيطة عادية بتحب الحياة .. صماء وحاليًا زارعة قوقعة، من صغرى بحب القراءة والكتابة والأطفال، خريجه تربية رياض أطفال .. بحب أتعلم جدًا .. اتعلمت واشتغلت حاجات كتير، وقفت في مكتبه تصوير ، اشتغلت مساعد أمين مكتبة، مدرسه فصل، قبل ما افقد سمعى تمامًا. حاليًا مهتمه بقضايا الصم وذوى الإعاقه السمعية والعمل التطوعى. عضو في مؤسسه سفراء العمل التطوعى، عضو فى مبادره صوتك ونس لدعم الصم وضعاف السمع. عضو هيئه مكتب امانه ذوى الاعاقه فى حزب الحىية المصري

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!