سارة من أطيب القلوب اللى عرفتها فى حياتى

إعداد: إيمان الميهي

أميرة سعيد (صاحبة سارة الأنتيم)

لما أميرة عرفت إننا بنعمل ملف عن سارة، وعايزين شهادتها قالت بالحرف الواحد: سارة أعز أصحابى مش عارفة هاعرف اكتب عنها وﻻ ﻻ..

ولما حاولت أساعدها وأجرجرها في الكلام بالأسئلة ابتديت معاها بـ:

  • مين سارة البطراوي؟

– بصى يا ستى

أنا أعرف سارة من أولى كلية، واكتشفت إننا كنا مع بعض فى ثانوى، وسارة كانت لغاية إعدادى فى مدارس لغات.. هى لأول وهلة تحسيها غريبة الأطوار، لأن هى من البنات اللى تحب تبقى شخصيتها، بس مع أول كلمة معاها بتحسى إنك عارفاها من سنين، إحنا ماخدناش وقت عشان نبقى قريبين لبعض وزى ما بنقول كده (أنتيم).

  • أيه أكتر حاجة بتميز شخصيتها؟

لما بتعرفيها بتحسيها شبهك وزيك كأنك بتتكلمى مع نفسك. أكتر حاجة بتميزها إنها مش بتقلد حد، هى شخصيتها .. هى نفسها، وبتعتز بتفكيرها وآرائها جدااااا وبتعرف تعرف كل حاجة ومستمعه جيدة جدااااا.

  • وأيه اكتر حاجة بتميز علاقتكم؟ يعني أجمل ما فيها كصديقة أو اللي بتلاقيه فيها مش بتلاقيه فـ غيرها؟

بصى.. الحاجة دى يمكن بتفرق معايا أنا وهى.. إننا بسبب الظروف طبيعى ممكن يقع مننا أيام كتير مانسالش عن بعض، ويمكن نقعد شهور مانشوفش بعض، عمرنا ماعاتبنا بعض، أول ما بنكلم بعض كأننا كنا مع بعض إمبارح وعارفين كل الـ updates عن بعض، وسارة بجد من أطيب القلوب اللى عرفتها فى حياتى، وده باين على ضحكتها اللى مابتفارقش وشها، وأعتقد كمان إنها من الناس اللى بيبان عليها قوووى اللى جواها، يعنى فرحانة بيبان.. زعلانة بيبان … غضبانة بردة بيبان، دمعتها قريية قوووى ممكن أبقى بحكي لها مشكلة ليا، أﻻقيها دمعت أو عيطت زعل عليا، وزعل إنها ماكانتش موجودة معايا فى الموقف مثلا.

  • آخر حاجة بقى وجهة نظرك فيها كفنانة

هى ما شاء الله عليها فنانة جدااااا، وبتحب تطور نفسها، وعلى طول شايفة إن مافيش حاجة صعبة إنها تتعلمها، شايفة إن كلنا موجودين عشان نتعلم أكتر، وكمان مبدعة وخلاقة بجد ما شاء الله عليها.

  • تحبي بقى تقولي لها أي حاجة في جملة ؟
  • أيه السؤال الصعب ده !

أنا بحبِك يا سارة بكل ما فيكى عشان إنتِ بتمثلى نفسك مش مسخ لحد تانى وﻻ لهوية تانية، ربنا يخليكى ليا ونفضل دايما مع بعض، وأشوفك من أعظم الناس فى مجال الفنون، ومش هقولك العرايس بس لأنك فنانة شاملة كاملة ماشاء الله عليكى وبالتوفيق دايما يا رب.

إيمان الميهي

إيمان الميهي

دراستي آداب إعلام راديو.. وحلم حياتي اشتغل في راديو.. درست كمان ترجمة.. وشاعرة عامية وعندي ديوان فردة حلق.. بكتب نثر فصحى.. بعمل ورش شعر وإلقاء للأطفال والكبار.. واتمنى أسيب أثر في الناس.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!