داما في عيون .. المطرب محمد رشاد ..

صوته المتميز أهله أن يكون أحد نجوم Arab Idol ومنه كانت نقطة الانطلاق اللي بيها نال إعجاب قطاع كبير من الجمهور في أنحاء الوطن العربي. محمد رشاد الذي لم يعرف الجمهور عن حياته إلا الجانب الفني مع داما هنكتشف جانب آخر من شخصيته وخصوصًا رؤيته للمرأة والعلاقة بينه وبينها في حوار جريء صريح خالي من الدبلوماسية.

 في البداية وجهنا لمحمد أسئلة عن أسرته الصغيرة وعلاقته بيهم .. وكان السؤال الأول:

_بتحب والدتك ولا والدك أكثر؟

أنا سألت نفسي قبل كده السؤال ده!  ولقيت أني بحب الأثنين جدًا لكن بسبب وفاة والدي من فترة قريبة ما كنتش أتخيل أني بحبه للدرجة دي. أنا بحب والدتي ووالدي بنفس القدر ولهم عندي نفس المكانة في قلبي. والدي كان خلافه الدايم معايا هو رغبته إن يشوفني في مكانة أفضل دايمًا. بابا كان قبطان بحري وبعيدًا عن السفر والغربة أنا خضت التجربة دي ولقيت الموضوع شاق ومتعب جدًا. لكي أن تتخيلي أن والدي تقريبًا له 45 سنة في سفر وغربة وشغل شاق عشان يوفر لنا مستوى جيد في المعيشة والتعليم. أما والدتي موجودة دائمًا في حياتي وفي البيت. كانت بتحفظني القرآن وتوصلني للمدرسة وأنا صغير. ولما كبرت بقت تسهر معايا وأنا بذاكر بالليل وفي أحيان كثير ما تنمش إلا لما أرجع للبيت.

_كلمنا عن والدتك.

هي أول داما في حياتي .. والدتي بالنسبة لي هي الدنيا كلها هي الحنان والعطف والثقة بتشجعني دائمًا في كل اللي بعمله. أنا بحترم الأنثى عشان والدتي الست العظيمة. ماما كل خطوة باخدها بيكون لها رأي كبير فيها. بحب أرجعلها لأن رضاها بيخليني أحس بكرم ربنا وتوفيقه. ربنا منح أمي أحساس عالي بتقدر تحدد بيه مدى نجاح الموضوع من عدمه. ربنا يديها الصحة ويخليها ليا ويخلي كل الأمهات.

_كلمني عن محمد رشاد الأخ هل هو صديق أم الراجل الشرقي الحمش.

أنا بجمع بين الأثنين .. أنا صديق وأخ قريب جدًا من إخواتي البنات لكن في بعض الأحيان الراجل الحمش بيغلب على الصديق .. بتعامل معاهم من منطلق أبوي يجمع بين الحب والتوجيه والمسؤولية ناحيتهم.

ومن هنا الأسئلة بقت ليها شكل تاني خالص .. حاولنا من خلالها نكتشف ملامح الأنثى في عيون محمد رشاد:

_إيه اللي بيلفت نظرك في المرأة؟

ذكائها .. أحب البنت الذكية اللماحة اللي ليها شخصية قوية لأن شخصيتي قوية .. مش عايزها تبقى تابعة. قوة شخصيتها هتخلي التعامل بينا له لذة مختلفة. ويلفت نظري المرأة الجذابة المتحضرة في تعاملاتها مع الناس وكمان المرأة اللي تملك قلب طيب.

 _أكثر حاجة بتضايقك في الست؟

الست لما بتزعل بتقفل خاصية التفكير في دماغها وما بتديش نفسها فرصة تفهم الموقف الأول وبعدين تاخد رد الفعل المناسب. هي بتقفش على طول وتفضل تتكلم كتير جدًا لغايت ما تلخبط وتغلط في الكلام وبعد ما تخلص كل طاقة الغضب اللي جواها ممكن تسمع .. ودي أكتر حاجة بتضايقني في الست.

_إيه الصفة اللي شايف أنها بتميز المرأة بشكل عام؟

إنها مصدر الحنان دايمًا إلى جانب كونها مصدر للجمال.

_تختار مراتك تبقى ست بيت ولا بتشتغل؟

لا طبعًا .. أحب أنها تشتغل لكن في مكان محترم وبوسيشن محترم. ده أفضل من أنها تكون في البيت وتحس بالملل. أغلب الوقت هكون مشغول فحرام اظلمها وأخليها قاعدة في البيت. وزي ما بحب لنفسي أكيد هحب أنها تخرج طاقتها وتحقق مستقبل كويس ليها وفي النهاية كله هيعود لأولادي.

_إيه الصفات اللي لازم تتوفر في شريكة حياتك؟

لازم تكون ذكية لأن الغباء بيتعبني جدًا مثقفة عقليتها متفتحة أنيقة في لبسها ومتحدثة جيدة.

_محمد رشاد معيار الجمال بيشوفه في البنت البيضا ولا السمرة؟

أنا بحب الأنثى عمومًا وبموت في الأثنين سواء سمرا أو بيضا كل واحدة ليها جمال خاص

_إيه الأغنية اللي شايف أنها بتعبر عن الأنثى في خيال محمد رشاد؟

أغنية” أجمل نساء الدنيا” لصابر الرباعي “مغرم” لجاد نخلة وأغنية “ولا ليلة ولا يوم” لخالد سليم .. هي بس تبقى موجودة وأنا هغنيهالها كلها.

بعد كده جه دور الأسئلة الجريئة .. وكان رده عليها صريح وصادق بعيد عن الدبلوماسية:

_هل شايف أن خيانة المرأة للرجل على نفس مستوى رفض خيانة الرجل للمرأة؟

أكيد على نفس المستوى

_هتعمل إيه لو مراتك خانتك؟

أنا متفهم ومتفتح جدًا وفي نفس الوقت راجل شرقي جدًا جدًا جدًا. ولما هتجوز هيبقى حب الدنيا كله لشريكة حياتي اللي أخترتها .. لكن هيكون في حل من ثلاثة لو هي خانتني:

الأول أني أسامحها ونكمل مع بعض .. وده صعب جدًا لأن كرامتي مش هسمحلي أبدًا أني أبصلها.

 الثاني وده صعب جدًا ويرجعنا للعصور المظلمة وهو أني أضربها بالنار هي واللي بتخوني معاه.

 الثالث وهو الأوقع بالنسبالي أننا ننفصل عن بعض  بشياكة وكل واحد فينا يكمل حياته زي ما هو عايز. لأن أكثر حاجتين بكرهم في حياتي الخيانة والكذب.

_لو في يوم بنتك جت قالتلك أنها بتحب هتعمل إيه؟

هسمع منها أكيد وهبدأ أفهمها إيه الصح وإيه الغلط .. لأن الشباب ماشاء الله أسلحتهم كتير وكل فترة بتزيد أنواع الأسلحة. هنصحها وأتناقش معاها عشان ما حدش يضحك عليها.

_مراتك جالها شغل هتسافر فيه برة مصر لمدة سنة .. هتوافق على سفرها؟

لا مش هوافق تسافر

_ممكن تتجوز ست أكبر منك في السن؟

السن مش هيفرق معايا المهم نبقى متفاهمين

_ممكن تتجوز واحدة أشهر منك؟

أحتمال أتجوزها وأحتمال لا بنسبة 50% في الحالتين. السبب أن خارج المجتمع العربي الموضوع ما فهوش مشكلة خالص. لكن في مجتمعاتنا الأنظار بتبقى موجهة إتجاه الشخص الأشهر. فكوني أتجوز شخص أشهر مني هيخليني أنا اللي مرتبط بيها مش هي المرتبطة بيا .. كرجل شرقي الموضوع هيبقى صعب عليا.

سألنا محمد كمان عن رؤيته للمرأة في مجتمعتنا العربية إيه اللي ليها واللي عليها:

_إيه الفروق اللي أنت شايفها بين المرأة في مجتمعاتنا العربية وبين المرأة في المجتمع الغربي؟

المرأة في المجتمع العربي مظلومة كتير وده يشمل نظرة الراجل ليها .. الذكر في المجتمع العربي مش بيتعامل مع المرأة على أنها النص الثاني وجزء مهم في المجتمع أو أنها الأساس في المجتمعات الإنسانية بشكل عام. اللي بيلفت نظره في المقام الأول لبسها .. وهي لبساه ليه؟ إيه اللي منزلها تشتغل؟ ولسه في قطاعات كتير في مجتمعاتنا إلى الأن بتمنع المرأة من حقها في التعليم وفي المشاركة في الحياة العملية. ثقافتنها كرجال في مجتمعتنا العربية صعبة ومش لطيفة. أما في الغرب تقييم المرأة بيكون من مستوى ثقافي وفكرى بينظروا لنجاحها في شغلها ومدى تأثيرها على المجتمع.

 _مين هي المرأة اللي معجب بيها كنموذج مؤثر في المجتمع؟

أمي هي النوذج اللي معجب بيه .. لكن أكيد أنا بحترم اي ست بتحقق نجاح في حياتها وتوصل بيه لمكانة تجبر الناس على معماملتها بإحترام. وده بالتوازي مع إحترامي للست اللي أختارت تكون في البيت عشان أسرتها وبدل ما تبني في نفسها قررت تبني في أولادها.

_تقبل تكون مديرتك واحدة ست؟

إيه المشكلة أنها تكون واحدة ست

_ممكن ترشح واحدة ست في منصب رئيس الجمهورية؟

هو فكر جديد جدًا وأكيد الأحسن هو اللي هرشحه. بس في النقطة دي شايف أن المرأة بطبعها كائن رقيق وحساس وفي النهاية ممكن عاطفتها تغلب على قرارتها. لكن الراجل قادر أنه يتخطى أحسايسه ومشاعره ويسيطر عليها فيكون حكمه على الأمور صائب أكثر. أنا مش مع أن المرأة تكون رئيسة جمهورية.

_من وجهة نظرك إيه هي الخلافات الدائمة بين الراجل والمرأة؟

دايمًا أول وأكثر خلاف بين الرجل والمرأة بيكون متعلق بالمسائل المادية.

_حابب تقول إيه للمرأة في مجتمعاتنا؟

طبعًا بحترم جدًا العاطفة اللي بتتميز بيها المرأة لكن بنصحها أنها تفكر بشكل عقلاني أكثر من أنحيازها لمشاعرها.

Spread the love

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!