داما في عيون الكاتب باسم شرف

االمرأة في سطرين؟

لمرأة بالنسبالي كائن رقيق وجواه حاجات كتير مبتعرفش تقولها .. صندوق مقفول مليان أسرارها ومهما قالت إنها كتاب مفتوح اعرفي إنها مخبية كتير ..

ولما طلبنا من باسم يكتب سطرين عن الداما فى أدوارها المختلفة قالنا :

الأم : ست الكل واللي تستحق إنها تاخد لقب الملكة .. اللي بتتمني إن كل الستات يكونوا زيها –

الزوجة : الحياة بكل ما فيها بحلوها ومرها .. لكن في الآخر اللي تتجوز كاتب أو مبدع الله يكون في عونها لأنها متجوز مجنون مطلوق في البيت ومحتاج رعاية مختلفة وتعامل مختلف أقرب للأطفال.

الصديقة : حاجة حلوة إنك تلاقي صديقة وتكون قريبة منك ولكن أظن ده بقي صعب بسبب الصراعات الموجودة طول الوقت في الحياة..

الأخت : هى السند وروحك اللي شبهك ..

المديرة : أنا ماليش مدير في حياتي لأني حر ومبشتغلش عند حد ..

الجاره : البنت اللي أول حاجة بتفكر فيها وبتحس فيها بكل مشاعر مراهقتك واللي عمرها ما كانت محور حياتك فيما بعد لكنها بتفضل حاجة حلوة في ذاكرتك وخصوصًا لما بتكبروا مع بعض ..

الحبيبة : كل حاجة حلوة بتمناها واللي لما باعمل حاجة مبسوط بيها بتمني إنها تكون معايا حتى لو كنت باكل أكله بحبها بتمني إنها تاكل معايا .. المهم متخلصش الأكل عشان مندمش على إني اتمنيت كده .. أكيد بهرج تاكل هى وبلاش أنا والله

ولما سألناه عن الاختلاف بين المرأة فى قناعاته وإبداعه .. قالنا باسم

 بالعكس أنا بكتب دايمًا اللي مقتنع بيه .. سواء عن المرأة أو اي موضوع تاني .. لكن تقدري تقولي إني ساعات بخاف أكتب حاجات عن المرأة الشرقية أو العربية والأمراض النفسية المستحدثة بسبب ضغوط المجتمع عليها والصراع المستمر بين الانغلاق والانفتاح بين العادات القديمة والحياة الجديدة بكل مستلزمتها .. يمكن بخاف اكتب ده عشان متفهمش غلط ويتقال إني بهاجم المرأة .. وخصوصًا إن عندنا هنا الناس ساعات بتخاف تشغل مخها أو بتخاف من المواجهة

وكانت نصيحة باسم للداما ..

حلقة من برنامجه الإذاعي اللي بيكتبه وبيقدمه ” تويتتتين وبس”

البنت الطموحة أقوي بكتير من الولد الطموح .. لأنها بتلاقي صعوبات كتيرة في مجتمع تقريبًا متدين بطبعه .. وبيحاول يثبتلها إنها من غير الراجل مش هينفع تنجح .. وبعد ما البنت بتحقق اللي هى عايزاه أو جزء منه بتتمسك أكتر بحلمها .. عشان تثبت للمجتمع إنها قد الحياة زيها زي الراجل .. فليه تضيعي وقتك في إنك تثبتي للناس إنك طموحة ونفسك تحققي حلمك .. اثبتي لنفسك إنك قد الحلم وهتحققيه وشوفي نماذج الستات اللي قدرت ووقفت وحققت حلمها .. –

داما

داما

التاء المربوطة في أبجدية بكرة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!